ភ្នំពេញ៖អ្នកស្រី
ធី សុវណ្ណថា អតីតអភិបាលរងក្រុងអរិយ៍ក្ស័ត្យ និងប្តី
ត្រូវបានសាលាដំបូងរាជធានីភ្នំពេញ ប្រកាសសាលក្រមផ្តន្ទាទោស
ដាក់ពន្ធនាគារម្នាក់ៗ កំណត់៣ឆ្នាំ និង ពិន័យជាប្រាក់ ៦ លានរៀល ពាក់ព័ន្ធពីបទធ្វើឲ្យខូចទឹកចិត្តកងទ័ព
តាមបញ្ញត្តិមាត្រា ៤៧២ នៃក្រមព្រហ្មទណ្ឌ ប្រព្រឹត្តនៅអំឡុងឆ្នាំ២០២៥ ។
ការប្រកាសសាលក្រមផ្តន្ទាទោសនេះ
នៅព្រឹកថ្ងៃទី១៣ ខែកក្កដា ឆ្នាំ២០២៦ បន្ទាប់ពី នគរបាលរាជធានីភ្នំពេញ
បាននាំខ្លួនអតីតអភិបាលរងក្រុងអរិយ៍ក្ស័ត្យ គឺអ្នកស្រី ធី សុវណ្ណថា
និងប្តីឈ្មោះ ផែ សុវណ្ណារិទ្ធ
ទៅតុលាការដើម្បីធ្វើការសាកសួរពាក់ព័ន្ធករណី
បង្ហោះព័ត៌មានលើបណ្តាញសង្គមហ្វេសប៊ុកផ្ទាល់ខ្លួន
ធ្វើឲ្យមានការប៉ះពាល់ដល់ការងារ សន្តិសុខជាតិ និងសង្គម ខណៈពេលសភាពការណ៍ខ្មាំងសត្រូវសៀម
កំពុងឈ្លានពានដែនអធិបតេយ្យភាពកម្ពុជា យ៉ាងក្តៅគគុក ។ សំណុំរឿងអ្នកស្រី ធី
សុវណ្ណថា និងប្តី តំណាងអយ្យការអមសាលាដំបូងរាជធានីភ្នំពេញបើកការស៊ើបសួរពីបទធ្វើឲ្យខូចទឹកចិត្ត
កងទ័ព តាមមាត្រា ៤៧២ នៃក្រមព្រហ្មទណ្ឌ ។
គួរបញ្ជាក់ថាកាលពីថ្ងៃទី
៩ ខែធ្នូ ឆ្នាំ២០២៥ មន្ត្រីនគរបាលយុត្តិធម៌ផែនសន្តិសុខនៃ
ស្នងការដ្ឋាននគរបាលរាជធានីភ្នំពេញ បានចេញ”លិខិតកោះហៅ” អ្នកស្រី ធី
សុវណ្ណថា អាយុ ៣០ ឆ្នាំ មានអាសយដ្ឋានផ្ទះលេខ ២៧០ ផ្លូវលេខ ៥៩៨
ភូមិទំនប់ទឹក សង្កាត់ ភ្នំពេញថ្មី ខណ្ឌសែនសុខ រាជធានីភ្នំពេញ ឲ្យចូលខ្លួនមកកាន់ការិយាល័យប្រឆាំងបទល្មើសបច្ចេកវិទ្យា
ចំណុះផែនការងារសន្តិសុខនៃស្នងការដ្ឋាននគរបាលរាជធានីភ្នំពេញ នៅថ្ងៃទី ១០
ខែធ្នូ ឆ្នាំ ២០២៥ វេលាម៉ោង ១៥និង០០នាទី
ដើម្បីមកបំភ្លឺលើការប្រើប្រាស់បណ្តាញសង្គម ។ អ្នកស្រី ធី សុវណ្ណថា
រួមជាមួយនិងប្តី ចូលខ្លួនតាមការកោះហៅរបស់សមត្តកិច្ច
ទើបសមតកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ តាមនីតិវិធី ។
បន្ទាប់ពីប្រកាសសាលក្រម
ទីបំផុតនៅរសៀលថ្ងៃដដែល ចៅក្រមស៊ើបសួរសាលាដំបូង រាជធានីភ្នំពេញ
បានសម្រេចចេញដីកាឃុំខ្លួនអ្នកស្រី ធី សុវណ្ណថា ដាក់ពន្ធនាគារខេត្ត
កំពង់ស្ពឺ ចំណែកឈ្មោះ ផែ សុវណ្ណារិទ្ធ ជាស្វាមី
ត្រូវបានឃុំខ្លួននៅពន្ធនាគារខេត្ត
កណ្តាល ជាបណ្តោះអាសន្ន ៕ ម៉េង ធា
